【美容院奇觀投稿分享】黑店連學生都想呃

投稿人：美容客人｜Ms Cheung

哈哈，第一次投稿，如果打得唔好唔好見怪XD

我係一個大學生，有返part time，搵嘅錢真係唔多，但慳慳埋埋每個月都儲到D。因為身邊D大同都會去做facial甚至醫美打吓針，咁我都心思思想打算用D錢去扮吓靚，想打針令下巴尖D。

我本身冇試過醫美，就上網搵吓邊間ok，咁我搵到間有好多Youtuber推介過，講到佢哋好真心，唔hard sell又做得好又唔貴，咁我就心動預約咗上去。

一上到去，已經打咗個突，因為環境同我想像中好唔同，燈光又白又灰咁，唔係果種好光猛舒服嘅美容院。最重要係一入門口左邊就係細細嘅等候區，C字型嘅sofa坐滿晒人，但每個人都好似面冇表情，有啲就敷緊麻膏，有啲就㩒緊電話，有啲又帶晒帽dup低頭咁坐喺度，總之氣氛好奇怪嘅，衰D講句有啲似集中營等比人伺候嘅感覺。

咁佢地員工簡單對返我個預約，就叫我坐低等等。咁我因為第一次做呢啲，都判斷唔到呢啲叫唔叫正常，咁就照等啦，等嘅過程都好緊張，又望唔到入面咩情況，中間聽到人哋個名一個入完去，又冇咩表情咁出返嚟，人來人往咁。終於到我啦，佢就帶我入果條窄窄走廊左邊第一間房，係要先見consultant。

個consultant一見到我，就不斷拎部計數機出嚟，係咁計比我睇一次買3針條數有幾抵，強烈說服我買一次係唔抵而且根本一啲用都冇，效果好快消失，買嚟係浪費錢不如唔好買。咁我自己一開始本身喺銀行禁咗足數現金出嚟，就係諗住唔好比人sell到，有幾多錢就只能比幾多錢。一開始我好堅定只打1針，同佢講我係學生我冇錢，但最後佢係咁講係咁講，講咗差唔多20分鐘，我終於都比佢嘅銷售手法動搖到，但我只有信用卡可以用。

咁佢聽到我ok，即刻笑晒咁，即刻收走我嘅信用卡，話幫我過數，然後話等陣即刻有醫生可以幫我打。但係睇嚟個天都想阻止我落搭一樣，結果我嘅學生信用卡嘅limit只有一萬，計埋我本身碌過嘅卡數，果筆數係超過咗呢個金額。喺呢個時候，佢哋同我講碌唔到，但竟然冇比返張信用卡我，而係不斷諗方法去令我比到錢。

一開始係話叫我打去信用卡公司講叫人哋比我碌，後來係叫我打電話比屋企人，叫佢哋拎佢哋嘅信用卡出嚟比我碌。我一聽到個人當堂醒咗，即刻想一針都唔打即刻走，不斷拒絕佢哋，但佢哋依然唔比返張信用卡我，開始想威迫我諗方法拎舊錢出嚟。到後來佢哋開始退讓，話咁你先打一針啦，我就同佢講：吓但你話一針係冇用架麻，係浪費錢，請你比返張卡我，我而加就要走，一針都唔打。然後我拎起電話扮打比friend，當住佢哋面講我而加既情況，仲叫個friend即刻上嚟接我走，佢哋先至開始覺得sell我冇用，最後真係死死地氣咁比返張信用卡我。

我即刻check一check張卡有冇過錢，好彩係冇，然後即刻走人，離開呢個鬼地方。然後我就暫時都未再試其他地方打針，暫時有啲陰影，怕又比人sell。但我真係冇諗過，果幾個我睇開嘅YouTuber講得咁誠懇，話從未遇過咁好嘅醫美，但事實竟然係咁樣。比起對間醫美失望，講真我對果幾位Youtuber更加失望！各位真係唔好好似我咁，聽人講兩句就信到十足，要小心啲揀。今次我好彩張卡過唔到數，如果過到，我就要喺果個鬼地方，打3次針，成為集中營既一份子…諗返都恐怖。

投稿人分享不代表本平台立場。

你也有關於美容業的趣事想分享嗎？無論你是客人/美容師/業界同行，歡迎大家投稿，立即上http://bit.ly/3DPj9y0，分享你的經歷吧！