【美容院奇觀投稿分享】雙人房忘我高歌事件

投稿人：美容客人｜Sze

想分享一下有次去做facial，果度有雙人房又有單人房嘅，咁可能單人房果次full晒，總之就安排咗我入雙人房做。隔離床見到係大概20幾歲女仔，好似都係啱啱開始做，兩張床都距離幾遠嘅，我就覺得冇所謂啦。

我一路都係半訓著嘅狀態，去到最後上泥膜，美容師就出咗房啦，咁啱隔離床聽到美容師講好似都係敷緊mask，咁我聽到兩個美容師都出咗房。咁呢個時候咁靜又聽住音樂，緊係開始訓覺啦，但係當我以為可以享受片刻寧靜之際，隔離床女仔開始大聲跟住音樂哼歌，明明敷住mask都可以唱到歌我覺得好勁。然後我一直喺度諗，佢究竟係咪以為冇發出過聲響嘅我已經完成走咗？佢好high咁喺度唱，仲要唱得好有感情，唔知等咗呢個moment幾耐咁。後嚟佢開始唔想跟播緊嘅音樂唱，開始唱自己想唱嘅，「我～愈唱愈強…」我好記得佢唱呢句，因為真係愈唱愈大聲。我就訓喺度諗咗好耐，為免大家睇到野同起身後尷尬，我決定要令佢知道我嘅存在，同埋測試吓佢究竟知唔知我係喺度。

於是，我深呼吸一口氣，然後一下大聲咳出嚟。「喀喀…」呢個時候，佢停咗，喺一句歌詞嘅中間停咗，佢冇再唱落去….原來佢真係唔知我喺度！！！果吓真係好尷尬，feel到空氣都凝住了，我都再訓唔返著啦。直到美容師入返嚟，我哋好似好有默契咁當冇事發生，但我內心係好怕同佢一齊落床走人，希望佢走先。咁我美容師拎走我塊mask後其實我就可以望到嘢，但因為果種尷尬實在太慘不忍睹，我決定都係合埋眼扮訓先，等到佢離開間房我先醒返。

最後好順利，因為佢比我早開始，都比我早完結，大概就係佢走咗之後2-3分鐘，我都可以落床走啦。搞掂晒啲野我以為佢應該走咗啦，點知我又喺等lift果度見到佢，為免大家尷尬落去，我決定轉身返返間店到去廁所，等佢走咗我先走。我諗，佢以後都唔敢喺雙人房唱歌啦。

投稿人分享不代表本平台立場。

你也有關於美容業的趣事想分享嗎？無論你是客人/美容師/業界同行，歡迎大家投稿，立即上http://bit.ly/3DPj9y0，分享你的經歷吧！